اتناساك

انساك واذا ماقدرت! .. اتناساك
انا اذا تناسيت شيٍ .. نسيته
اصّدق بموتك ولا اصّدق بكاك !
خسارتي وياك رقم ولغيته
(علي بن حمري)

ماغير امك وطن

امك ماغير امك وطن يابن الاجواد
فرصة حياتك ضمها واغتنمها
في حضنها رحمة وقصة وميلاد
ما يكفي الجنة مواطي قدمها
بعيونها تسهر معك هم وسهاد
حرام تاخذ نومها وتحرمها
لو يزعلون اغلى المواليف وش عاد
والله مايسوون ماطى قدمها
(محمد ال عمرة المري)

من طول الغيبات

من طول الغيبات جاب المعاذير
في هالزمن ., ما عاد فيها غنايم !
لا تقول .. هالمره ترا غيبتي غير
ما عاد تفرق ., لو تبي تغيب دايم !
(مطلق الجبعاء)

المدى

سيف الغضب ماضي خلي الكلام يموت
ووقت الغضب ماضي .. لا ترجعيه .. بصوت
(بدر بن عبدالمحسن)

بعض الخطا

الله كم ينسون الأصحاب ودي
وكم شلت يالقلب الصدوق الخطية
كم جاتلك زلاتهم قلت عدي
بعض الخطاء تشفع له المقدرية
(خضران المطيري)

مرو البال

مرّو البال لكن انت وقّفت فيه
وصار مافيه احد بعدك حبيبي يمر
بس عندي سؤال ابي تجاوب عليه
انت ناوي توقّف فيه طول العمر ؟
(سعد علوش)

مجموعة انسان

اسقي قلوب الناس عشقٍ وضميان
واهدي حيارى الدرب واحتار ويني
واحاوم طيور السماء حوم نشوان
واسيل الوديّان دمعٍ حزيني
(خالد الفيصل)

ياهل العشق ..

ياهل العشق الجديد الممتلي بالفاضي
من جهلكم في حبايبكم عليكم خشية
والله اني أعرفه زعلان والاّ راضي
من تلفّاته علي ومن طريقة مشيه
(سعد علوش)

دواك الهبايب

دواك الهبايب يا بقايا الثرى الموشوم
انا واحدٍ يرقى لا طاحوا من عيونه
ما اقول السماء خفت ليا طاح منها نجوم
انا اقول الارض ترابها ما يساوونه
(سامي العرفج)

طاري السفر

وانا احبه مثل حب العرب للشجاع
اللي ليا شاف صعبٍ في اللقا طوّعه
واحب حتى دموعٍ سِرها ما يذاع
لأن دمعته تسعدني وهي موجعة
اشوف فيها غلا واشوف فيها اندفاع
واحس فيها بعد ضيق المواصل سَعة
جيشه ضلوعي وقلبي له وزارة دفاع
وحدود صدري حدوده.. والحشا مربعه
باموت ماجا على عرشه بقلبي نزاع
بدت مقاليد حكمه خاتم في اصبعه
فلا يوادع وانا ما احب طاري الوداع
الغالي.. أشد ما يوجعني اودعه
به شخص نبكيه دهر وشخص نبكيه ساع
وبه شخص لا غاب .. غابوا ناس واجد معه
(علي بن حمري)

123الأخير ›