أبيات بواسطة ابو كيان

الليله البرد

الليلة البرد ناوي ينزع أوراقي
والدمع كنّه مع الأجواء متجانس
أبكي على اللي ضحك .. ماهمّه فراقي !
والغيم يبكي عشان الارض تستانس
(عبدالرحمن الرويس)

والله كبيرة..

والله كبيره يحسبونك من اعداي
ابك أنت وش عندك عشان استغلك؟
انا عدوي لازم يكون شرواي
حتى عدوي لاتظن يحصلك
(خلف المشعان)

بعض الرجاجيل

بعض الرجاجيل لازم تاخذه عبره
وتجنب اشيا لاشفته يسويها
يشيل نفسً كبيره كنها الزبره
وجسمً وجثه ولكن عقل مافيها
(الاسود العبدلي)

حنا اصابعنا..

حنا اصابعنا يابنت الله خلقها للزناد
والا اصابع غيرنا خلقت لحك خشومها
(سليمان المانع)

رسمتك حلم

تدري وش اصعب شي مر بحياتي
وخلاني اندم بالعمر دامني حي
اني رسمتك في جبين امنياتي
حلم وطلعت ..وبالنهاية ولا شي
(انور جالي العبدلي)

ماني قليل شرور

الا يامصدقً نفسك ترا ماني قليل شرور!
آخوك يجيد فن الصيد وسط الميه العكره
آعرف آمشي معك سيده واعرف الف معك وادور
واعرف ازرع طريقك ورد وادس بروعته حفره!
واعرف اشياء كثيره بس مو من عادتي هالجور
ولا من عادتي اخون حتى خاين العشره
(آحمد شاهر البلوي)

على الغدير

على الغدير وجهي ووجهك والسما
من يسبق ويملى يديه ويشرب ملامح صاحبه
(بدر بن عبدالمحسن)

تجربة شايب

عندي من الوقت خبره وتجربة شايب
سبعين غيري تساوت مع ثلاثيني
(عبدالرزاق الهذيل)