أبيات بواسطة الرويلي

طيري روح..

البارحه والطير ياصاحبي طار
فكيت سبقه والتفت لي ولوّح
أقفى وأنا أطوح يديني ومحتار
أسوق رجلي في طريقي وأموّح
ياجيرة الله وش بقالي من أعذار
باللي نزع ثلث المشاعر وطوّح
ياصاحبي والله يجيرك من النار
البارحه طيري تعشى وروّح
(أورنس بن خطاف)

تويتر !

كلاً يغرٌرد! على كيفه..تغاريده!
صرنا بلابل ولا نعرف وش نريده !
الله خلقنا نسيد الكون و العالم
وصرنا عبيد وكل منا وله سيده !
(أحمد المرخان)

هي أميرة..

ما ترك لي اسمها الساطي غزل!
هي أكتفت من حالها و بحالها
علمت حتى السمو كيف الزعل !
و من يلومه لو مشى بظلالها
هي أميرة بجدها والا هزل !
غصبن يقوله .. واحدن نادالها
(أحمد المرخان)

سذاجه..

ما جيت أدور فالمعاني لطافتك !
مثلي عن أمثالك ما هو بحاجه
جرب تعيد النظر في شفافتك !
بعض الصراحه في نظرنا سذاجه
(أحمد المرخان)

بالـo و بالـ x

بالـ O و بالـ X لعبه وطالبك
بيديك تفرق بها العالي وناكسها
حط الدواير على ناس تعجبك
واشطب على باقي الناس واكسها
ما هي ضروره تساير و تتعبك
ناسن غثيثه تحب انك تعاكسها
ناسن طويلة بال حذراك تسلبك
أوقاتك اللي ذعذعت لك نسايسها
شاغب حياتك وشف وشلون ترغبك
ترى الحياة تحب من هو يشاكسها
ما كل محبوبن تحبه و يطربك
ولا كل من يقرب لنفسك ينومسها
خلك أنت الضيف وأنتا معزبك
ولا تستحي منك لو انت حايسها
(أحمد المرخان)

قلبي نسيته..

دور وتلقى داخلك شي ناسيه
توي فقدته..و أحسب أني خذيته!
يومي حضنتك قلبي الغادي اثريه
ضمك وأنا من فرحتي بك نسيته!
(أحمد المرخان)

دانه..

كانك تبي سكان هالأرض تعرفك !
و بالجزيرة لك خبر عاجل إعلانه
و تصير للناس قصة تسولفك
جرب وحاول تزعل بالحكي دانه
(أحمد المرخان)