أبيات بواسطة شادن

تبيه!

تبيه..تحت الليل وأسياط النظر والخوف
تبيه..والميعاد عيا ينتظر ملهوف
تبيه والساعه دهر.. مامر.. ما أرسل خبر!؟
ماملت..وظلت تحتريه
كانت تعض إبهامها حيرة
كانت تشب وتنطفي غِيرة
كانت تموت وتحتضر
كانت أبد..ما تنتظرغيرة
(أسير الشوق)

من أكون!

تعبان مني يـ أنا!؟
وإلا أنا .. مني .. تعب !؟
سؤال أعقل من جنون !
سؤال أقسى من حنون !
أنا .. أنا ...!؟
أو ..
من أكون؟
‏(بركات الشمري)

خبرتوا !!

خبرتوا حد ٍ يبكي على واحد ٍ يبكيه!
وخبرتوا حد ٍ مسجون مايبغي إفراجه
أحبه ولا أبغضته على شي يسويه
ولا زالت أرقاب الرجا فيه منعاجة
عسى منزل ضمه.. حقوق الوسم تسقيه
وتضحك له الدنيا وهو يضحك حجاجه
فقد خاطري شي من الضيقة مسليه
وغدت روحي من الناس والليل هجاجة
أروح لمكان خابره.. خابره ياتيه
أسوق القدم صوبه وهي مالها حاجة
مكان نزيه وأول مواجهي له فيه
وأنا خابر مارجل مثله بدواجه
لعل وعسى ماحدني للمجي يدعيه
وأشوفه وأنا ماودي أسبب إحراجه
يحب الجريح أخر دروب اللقى ويجيه
وتحب القدم جية مكان أول مواجه
(محمد بن فطيس)

الطيش

تدري إن الطيش ملح الحب كله
خص لا كان ممزوج بحماقه
(فيصل العدواني)

لايطول سكوتك

لايطول سكوتك ولايطول سكاتي
ترى الدعاوي بسيطه لا تكبرها
خلك على خبري وظني وهقواتي
خابرني الضيق والضيقات خابرها
وسع لي البال ياسيد طموحاتي
ولاتغير النظره اللي كنت تنظرها
تقول حب البشر طوق مساراتي؟
أبك أنت حبك مساراتي يسيرها!
‏(محمد جارالله السهلي)

أكبر خطاي

تدري وش أكبر خطاي الله يسامحني
إقفايتي عنك وأنت اللي تمنيته
‏(تركي الميزاني)

يجيب السفر طاريك

يجيب السفر طاريك يا حي ذا الطاري
وأنا ما بين تغميض العيون ومدامعها
غريب السفر والأغرب إحساسه الناري
ياكم ناس فرقها وياكم ناس جمعها
على الرغم من كمية الكبت الإجباري
يبين شعور الناس لما توادعها!
(سعدعلوش)

كل التعب قضه

ياعاشق الصمت بيبان الحكي فضه
أدخل بها يمكن الاحـزان تنساني
مض الزمن بالحكي والسالفه مضه
ما باقي الا انت..والا..مت وحداني
مابيك تذخر تعب كل التعب قضـه
مرتاح لا صرت تامرني وتنهاني
‏(هلال المطيري)

أحبك أكرهك

أحبك أكرهك أشتاق لك أفتقدك
كل شي فيني على مافيك وصاني
‏(سعد علوش)

غلاك

غلاك بداخل عروقي ولايوصل غلاك أنسان
يمر الوقت ويثبت لك غلاك إن الله أحياني
بضحي بعمري لعيونك تنام إنت وأنا سهران
وأنادي جروحك لقلبي وتجي واحد ورى الثاني
(فيصل اليامي)