أبيات بواسطة معاند الجرح

العهد

انتي وانا والشوق بالحب نلتم
ما احد سوانا والمخاليق تدري
دامك معي لا يضيق بالك وتهتم
خلك سعيد وخل همك بصدري
هذا عهد و العهد لاحلامنا لم
اما سوا و الا هنايه بقبري
(وسام العصا)

عذاب البعد

غالي ولك كل الغلا وانت مسموح
لو طال بعدك وامتلاء قلبي جراح
بعدك عذاب اتعب القلب والروح
وقربك يريح القلب والروح ترتاح
غلاك ما هو هرج يقال ومزوح
مثل النجم ثابت وبالشوق هو لاح
(وسام العصا)

تحدي

كان هالدنيا خذت مني وجودك
تتعب الدنيا ولا تاخذ غلاك
(وسام العصا)

عزيز النفس

صاحبي طالبك لا تقسى عليه
دام قلبي والمشاعر لك سبايا
لو جروحي من سببكم سرمديه
بك يهلي القلب من قبل الشفايا
من عرفتك اصبح لقلبي هويه
لأجل انك ساكن بوسط الحنايا
شف عزيز النفس يطلبك الحذيه
وصلك اللي منه انا جروحي برايا
(وسام العصا)

الغلا

بحق الذي يسجد ويصلى له الفرض
ماحام طير بالغلا غير طيرك
(وسام العصا)

البعد والحب

بعدك عذاب محرق قلبي احراق
وقربك اماني قلب حبك حيابه
بحق الذي يخلق وللعبد رزاق
عن حب غيرك سكر القلب بابه
جتك المشاعر ضاميه حيل تشتاق
تسألك حبك.. وش تكون الاجابه
(وسام العصا)

سؤال وجواب

كم سؤال مات في صدري جوابه
وكم اجابه حية قبل السؤال
السؤال يتيه في ليل سرا به
والاجابه ثابته في كل حال
والسؤال اللي له بنفسي مهابه
ليه احبك حب جاوز للخيال
(وسام العصا)

العز

ما يموت العز في قلب الحشيم
ولا يضيع العرف برجال حشام
للصداقه نور بالليل البهيم
مثل نور الشمس لا زاح الظلام
تمتلكني فطنة الرجل الفهيم
كن بين الطيب ومابينه هيام
والمثل قالوه من وقت قديم
ما تخاوا الحر مع فرخ الحمام
(وسام العصا)