أبيات القصيد | أبيات جديدة





أبيات جديدة

الصداقة ..

والجفى من بين الاصحاب عيب من العيوب
والصداقة من بنا بيتها ما يهدمه
واعرف الكذبة لا جت من فم الكذوب
لا قعد يرفع لسانه ويرخي برطمه
ومزحة الطَيب ما تجرح متينين الجنوب
عَقِّب اللي مزحةٍ من رفيقه تِفحمه
(سلطان الهاجري)

الباقي بعمري ..

‏لا تاخذين الأيسر بصدري
‏خليه ما دامه رجع لي بخير
‏الباقي بعمري هو لعمري
‏ماودي أعيشه لعُمر الغير
(سلمان بن خالد)

ساقني حبك

ساقني حبك على الموت وسنيني هزال
والظروف اقسى من الظلم للعرض النزيه
وانتي تسوقين عقلي على حد الهبال
تحسبين ان من بغى شي ..يقدر يشتريه !
والاّ انا يا وجد حالي وجود ٍ ما يقال
وجد من ضحّى بغاليه لْرضا والديه
ويا وجودي بأول العمر قبل البس عقال !
وجد من باع اخر العمر في رغبة ذويه !
(ضيدان بن قضعان)

الهدايا ..

يافديت اللي بقاياهم بقايا
فالرفوف وفالدروج وفالزوايا
الهدايا فالبداية تعتني بك
لكن آخر شي .. تقتلك الهدايا
(سعد علوش)

سهم البورصة

لا طاح سهم البورصة والذهب طاح
قامت سهوم الطِيب والطيبيني
(سعد بن جدلان)

اخيه ..

أخيه من حبٍ يجي فيه ذلة
يحط من قدر المحب و وقاره
من لا يرى في عشرتي مكسبٍ له
فـ انا ما اشوف ان في فراقه خسارة
(علي بن حمري)

شيبتين

في عارضي لاحظت بادي شيبتين
واكيد ماهن جالسات بلا خوات
استعجلن قدام سن الاربعين
موقرات وزاجرات ومنذرات
والشيب سنة من عصور الأولين
لازم يصير ان كان ما صار الممات
الصادرين يودعون الواردين
والواردات اكيد بكرة الصادرات
يارب توزعني طريق الشاكرين
المؤمنين اللي على دين وثبات
(عكاش الذيابي)

حنا عزاز

لو كان عندي ما فراقك بهاين
حنا عزاز ولا نهين العزيزين
خلك تروح ولا تشوف الغباين
شاملك عفوِِ مثل عفو المساجين
(عبدالله بن عون العتيبي)

املي في رجاه

يالله ياللي خوفتي منه واملي في رجاه
يا قديرٍ تقدر تِظل عبدك وتهديه
لا تنقّص لي مع طيبين الجاه جاه
مع طويلين اليماني وبيضان الوجيه
حزةٍ لا من بغى الرجل مقداره لقاه
ينعرف فيه الجناب المقدّر والسفيه
(سعد بن جدلان)

شهر نوفمبر

اشوف فيك النور ماله مقاييس
وتشوف فيني كل غاوي وشيطان
تركتني وانا رفيق النواميس
وخليتني في السجن من غير سجّان
يغفر لك الله كثر مالك محابيس
لوكان ما حنا ولايف ..حنا اخوان
الوصل عذرك يالعيون المناعيس
ان كان باقي شان والا على شان
لو شهر نوفمبر يعرف الأحاسيس
ما كان جانا وأنت ليلحين زعلان !
(سعد علوش)

ياقلبي المنفي

يا قلبي المنفي من الغالين
إضحك ولا تفتح لـ حزنك باب !
عادي وإذا طاحت دموع العين
قدْ طاح من عيني كثير أحباب !
(محمد الكواري)

لا تشتكي وقتك

لو عشت عمر شعيب وانت بمهونة
ضايع .. وما تقضي من العمر ضايع
والعز .. يوم يغامر الرجل دونه
واعمار غيرك مثل عمرك .. ودايع
واليا لقيت أهل الدهر يشتكونه
لا تشتكي وقتك على كل صايع
(خلف بن هذال)

الرعاع ..

ما يوقّف للرعاع .. الا الرعاع
الخصم ياخذ من اخصامه سِمه
و الهجوم .. افضل وسيله للدفاع
بس .. ما كل الهجوم بـ نهجمه
ما نواجه مَن على وجهه قناع
الضعيف يسدّ عن فعله : فِمه
والله إن البغض في طبع الشجاع
اجمل مْن الود .. في طبع رخمه
(فيصل العطاوي)

مرحبا رمضان

رمضانُ يا مسكَ الشهورِ تعطرتْ
أيامُنا وازدانت الأنوارُ
أقبلتَ صبحاً يزدهي بجمالِهِ
فتفتحتْ وتبسمتْ أزهارُ
والصومُ يُهْدِي للنهارِ سلامَهُ
كالسُّحْبِ في طياتِها الأمطارُ
أقبلتَ بدراً باسماً لقيامِنا
والنورُ يسري والرضا أقدارُ
أنت الحبيبُ أتى وتمضي مسرعا
فرحتْ بك الأوقاتُ والأخيارُ
(محمد جنيدي)

حتى وليفك

الوقت لو زان لك ياصاح مادامِ
ياسرع ماتعترض دربك بلاويها
حتَّى وليفك ولو هيَّم بك هيامِ
سيَّور الايَّام تجنح به عواديها
(خالد الفيصل)