مشاركات بواسطة فارس الشايع

جروح الحنايا

يا صغري بعين الفرح كل ما التمْ
حولي جروحٍ بالحنايا يا كبره
(فارس الشايع)

للعيد فرحه

للعيد فرحه تظهره بسمة شفاه
وكل عام وإنتي للمعاليق فرحه
إنتي معاني العيد وأغلى هداياه
دامك حضرتي فيه بيطول شرحه
(فارس الشايع)

تفاءل بالأمل

دايم تفاءل بالأمل قدر الإمكان
وإنسى حبيبك دامه إنسان عابر
من هو رحل لا تسأله وينك الآن
ومن هو لفى لأجل الغلا لا تكابر
(فارس الشايع)

سرابك..

مثل السراب أشوفك اليوم تختال
كل ما أقترب منّك مع القرب تِبعد
(فارس الشايع)

كلّي أماكن

هلابك يا عديل الروح لكن
بليّا شوفتك الكون داكن
بليّا شوفتك أطيح مُنهك
على شوفك وأنا كلّي أماكن
(فارس الشايع)

مواعيد عرقوب

واجد ترى من يفتلون الشوارب
وواجد كلامٍ تسمعه ما تشوفه
عرقوب يقرب له وهذي التجارب
والرجل يافي لو تحدّه ظروفه
(فارس الشايع)

دروس الأيام

هذي هي الدنيا دروس وعلاقات
بأيامها صفحات فيها كذا درس
إدرس مع العالم وخذ لك شهادات
تحصد نتاج الزرع لو يبطي الغرس
(فارس الشايع)

غياب الشمس

هذا غياب الشمس يشبه تغلّيك
بس إنت غير الشمس ما عاد تطلع
(فارس الشايع)

جانا رمضان

جانا رمضان وهل فيه التباشير
والخير أقبل في ركايب مسيره
والقلب أعلن توبته دون تأخير
ما دام ربّي رحمته بي كبيره
(فارس الشايع)

دنياي

دنياي ترمي لي هموم ومقادير
وأنا تعبت أشيل همّي لحالي
البال ضايق والمحبّه مشاوير
والرابح اللي ذاق بالعشق حالي
جرعت سم الحب بيرٍ بأثر بير
وما كنت من زود المعزّه أبالي
(فارس الشايع)