عندي من الوقت خبره وتجربة شايب
سبعين غيري تساوت مع ثلاثيني
(عبدالرزاق الهذيل)

عزاه ياقلب(ن) تولع على ماش
ماغرته خضر السنين و كدرها
ضايع بهجمات الفقر و التنحاش
ودفاع بابه ولعتين(ن) بنحرها
يولع بهن لا صار بالقلب نقاش
يبرد مغاليل الدرك لا فجرها
بايع دنياه على طرفة قماش
والاخره عنده تساوي كثرها
(فهد عبدالله الماضي)

اصبر ترا صبرك على الناس ياقاك
لو شفت منهم ماحصل من بوايق
كمل جميل لك و فرح القلب وياك
بكرا تشوف اللي هويته يوايق
ان شلت همه زاد عشقه لبلواك
و اليا تركته جاك بكل الطرايق
(فهد عبدالله الماضي)

مات الجمر وقلوب الأحباب حيه
والموت لا ماتت قلوب الحبايب
يا شيشتي لو فيك ذنب وخطيه
معاك أحس إني عن الناس غايب
العام كانوا لي من الأصحاب ميه
وقت الرخا لكن جفوا بالنوايب
لا هنت يا قلب شكى من خويه
كم راس من طعنات الأصحاب شايب
(حمد السعيد)

عيشي حرَّة في زمانك كان ودِّك تفرحين
الهوى بْمفهوم آدم سد رغبات و ضياع
لا يغرِّك في بياضه .. حقده أبيض ما يبين
في ذراعه يحتويك و يطعن بنفس الذراع
(ناصر الدهمشي)

اثبت لك اكبر دليل ان الزمن جاحد
وإن المفاهيم عند الناس مختلطه
أفعالنا الصح يلغيها غلط واحد
وأفعالنا الصح ماتلغي ولا غلطه!
(ماجد النصيف)

طوعوني وأنا ماكنت أطيع
وأغلبوني وانا قرم وشجاع
ضحكتي بينهم وانا رضيع
ماتساوي دمعتي يوم الوداع
(بن لعبون)

ياشيخ انا راحت بي علوم و افكار
عن الذي حط الفخر تاج راسه
ما جاه مني كود حرفين و ازهار
حتى اتصاله يطرب الخط بوناسه
ودي بشوفه لكن الود مشوار
يسكن بقصر(ن)فيه اعظم حراسه
(فهد عبدالله الماضي)

صحّ المشاعر كلها وأنت راقد
ما ابيك تصحى والمشاعر بك رقود
كان المحبّة ما تشب المواقد
تبقى كذا جزء من النص مفقود !
صعبة تجدني وأنت للحب فاقد
والأصعب إني فاقدك وأنت موجود
(غير معروف)

توَجِّدَوْا فِيْ صَدْرِي المُغْرَمْ بَدُوْ
شَدَّوْا رَحِيلْ، مْفَارِقِينْ بْلا وِدَاعْ أَحْبَابِهُمْ
كَانَتْ تِفِيضْ أَرْوَاحُهُمْ زَفْرَاتْ كِلْ مَاتْنَهِّدَوْا
وِيكَابِرُونْ، ويَجْبُرُونْ مْصَابُهُمْ بِمْصَابُهُم
عَضَّوْا عَلَىْ الدَّمْع بْجِفِنْ، وِلْعَبْرَةْ الصَّدْر وْأَدَوْا
صَلْفِينْ، مَا كِنّ الّذِيْ قَدْ نَابُهُمْ قَدْ نَابُهُمْ
تِشَاغَلَوْا عَنْ حَالِهُمْ، عَنْ غُرْبَةْ البِعْد وْحَدَوْا
تِمَنَّوْا الغِيمْ يْهَطِلْ يِمْكِنْ يِبِلّ أَهْدَابُهُمْ
(عبدالرحمن الغبين)