ترديت

تردّيت.. لكني تردّيت في رجّال
‏ليا طِـبْت علّم وان تردّيت ما علّم
(سلطان الهاجري)

المرجلة

والمدح ما يزهى على كل رجال
ومدح العفن مثل ارتكاب الجريمة
جريمةٍ تبقى على مر الاجيال
من سبته تلقى العواقب وخيمة
(فهد بن ريحان)

لو

لو من بغى شيء تهيا بكيفه
كلٍ دفع مركب هواه ومشى له
لا شك ما يدرك عشير النصيفه
من ما اشتهت نفسه وصور خياله
(فلاح بن مبرد)

قلبي خويي

رغم الجروح اللِّي بقلبي معاطيب
حبّيت كفّين الزمان و شكرته
قلبي خويي، ما لقلبي معازيب
واللِّي حقرني.. من رداه احتقرته
(سعد الحريّص)

سلم على

سلم على الضايق اللي يصنع البسمة
اللي جلده الزمان وعاده ينكّت
يقوله اللي طَرَق صدره هوى النسمة
من بعد ما هموم صدره بالعنا دَكّت
الناس ما تعرف إلا الظاهر بجسمه
وبالخافي الناس لا شِكَت ولا اشتَكّت
دنياً على ذا البشر با الغي مرتسمة
كم ضحكّت كم.. وكم من واحد بكّت
التجربة بالصبر والعقل من وسمه
والمرجلة بالفعل لا حكّت ولكّت
(مهدي بن حويل)

طعم ثاني

جنبك يصير العمر له طعم ثاني
أحس فيه بقيمة الوقت وأحصيه
لا جاد وقتي باللقا لو ثواني
عندي تساوي كل عمري ثوانيه
حاولت أقاوم موج حبٍ خذاني
لبحر الغرام اللي عرفت الغرق فيه
ياللي تحمّلت الملامه بشاني
من شأنك أجمع باقي العمر وأهديه
(سعود بن بندر)

ليلة شتاء

ما تذكر بليلة شتاء قلت لي شي؟
كنت بتفاصيلك من الشوق .. غارق
تقول لا جيت أطلب مفارقك عَيْ
حرام في فصل الحنين نتفارق !
(نايف الرشيدي)

مشاعر

إن قلت أحبك يا حبيبي قديمة !
قد قالها قبلي كثيرٍ من الناس
ليت المحبة فـ القلوب السليمة
دون الحكي توصل من إحساس لإحساس
(مشاعر نجد)

ناسٍ

ناسٍ إلى منك تواصلت معها
تلقى الكلام اللي يغثّك ويزعجك
في جدّها في مزحها ما منعها
طبع الرجال اللي يوافق لمنهجك
إن طعتني هاكْ الحِكَمْ واتِّبعها
اقطع خيوط المعرفة قبل تحرجك
والكلمة اللِّي ما انت عارف سنعها
لا تعترضها وانت داري بمخرجك
(عناد المطيري)

يا ليت

يا ليت لي قدره على فعل ثنتين
ولا هي علي من الامور الكليفة
تسديد دين اللي يعاني من الدين
وتوظيف ناس ودها بالوظيفة
(لافي بن حمود الغيداني)