مشتاق والشوق رغم البعد سرّاني
وسريت مسرا الفشق من فاه رشاشه
ما فيه موتر من السرعة تعدّاني
ولا فيه ساهر أمر إلّا على فلاشه
من جرب الشوق يعرف منه وش جاني
ومن لامني قلت هذا الشوق ما ناشه
( سليمان الشاردي)

الجرح يبرى لو تطاول مع الهم
والصمت مرهم مشترين الطوايل
خذها نصيحة بلا حسابات او كم
مهما كبر جرحك مع الوقت زايل
(مهران العدوان)

‏ليت العمامة سالمة من متونه
‏اليا لبسها طاح سعر العمامة
‏لو فالمراجل "ساهر" يطبقونه
‏في كل صبح وليل ياخذ ،، غرامة
‏ماهوب خادعنا بضحكة سنونه
‏ولاهوب خادعنا بـ حالي كلامه
ادارة الأحوال .. لو يعرفونه
‏بعد اسمه يحطون "وانت بكرامه"
(ابراهيم مرشود)

طرد السراب لمن يحسبه ماء ماهو مشكله
المشكله طرد السراب لمن يعرف انه سراب
(رشيد الدهام)

طاح التعب وارتاح
في مشتل الغالين
يبغى العبير وفاح
في مهجته نسرين
ليت الهوى فلاح
ويذكّر السالين
إن الجمل لا طاح
صار الزهر سكين
(محمد بن مصوّي)

يا غبيش ابن خليل سلم على عمير
بلغ سلامي لابن عمي وقله
المعذره لو ماتفيد المعاذير
عن موقفن اكبر من العذر كله
مير الظروف الطاريه يا المناعير
ما هي على كيف المخاليق لله
حركت من الافلاج حزة عشا الطير
عقب العصر يوم الشجر مال ظله
وقبل العشا متعدياً حوطة سدير
ويرن جوالي بسرعه و اشله
هلو.. نعم.. سلام مسيت بالخير
والياه صوت جعلني فدوتن له
قالت وهي فيها من الحزن تاثير
خالك منوم في محلاً ممله
وما انتبهت الا وانا عاكس السير
كني عمى والا العقل فيه خله
هذا يعذرني من اغبيش واعمير
اثبته و اوثقه بالادله
(سلطان الهاجري)