ياما على نفسي بالأحلام كذبت
ويا ما صبرت وصبرنا مانفعنا
وياما .. وياما من وداعه تعذبت
وياما نحاول نفترق ما استطعنا
كم مرةٍ ودّع وكم مرةٍ غبت
وكم مرة عقب الوداع إجتمعنا
لا قادره أنساه مهما تهربت
ولا معترف في حبنا مجتمعنا
(عابرة سبيل)
الصيف قرب واعذابي من الصيف
يبي يروح الزين ماعـاد ينشـاف
ياصيف ..لا تبعد قلوبٍ مواليف
ارفق ترى قلبي على جال ميهاف
في بحر حبه ما تفيد المجاديف
انشهد ان الدار لا غـاب تنعاف
(عبدالله عبدالعزيز العليوي)
بعد فقد الأمل في رجعتك ماعاد لي إلا
أسلّي القلب عن طاري غرامك وادفنك فيني!
أنا والله مالي قوة ٍ لو كنت تتغلا
أجل وشلون لامنّي دريت إن انت ناسيني ؟
(زياد بن فهد)
علموه إني ما احبه كثر مايحبني
والله أكثر بس عشانه أقول إنّا سوى !
وعلموه إنه تركني وانا محتاج له
حاجتي للدمع , والزاد , والما , والهوا!
قد دعالي إني أنساه لكن مانسيت !
يمكن إنه كان يدعي بغير اللي نوى!
(ابراهيم الرشود)
جيت للدنيا وحيد وبأترك الدنيا وحيد
مبتدا دربي عرفته والله ادري بمنتهاه
وأدري إن الخاتمه إما شقي وإلا سعيد
يالله إجعلي من إسمي حظ وإرفع مستواه
(سعيد الحمالي)
