يا هوى
للأسف ما لك خوي
إرجع لماضيك واقرا في حكاوي العاشقين
واكتشف كم عاشق(ن) عـيّا يعيشك مرتين
راح تلاقيهم كثير
شاعر وعبد وأمير
ولا تظن اني الأخير
مدام طبعك فوضوي
(ياسر حسن الجنيد)
أنا ماني على قيد الحَيَاة اللي على قيدك
أنا قيدي حَيَاة ٍ لا اسْتَرحت ابْهَا بديت أتْعَب
مواعِيد الوصل في يْديك يامَا أكذب مواعِيدك
وأنا لو إني أفهم بعض كِذبك..قلت لك تكذب!
أَشبّهك بصباحي ..مغربي ياصعب تحديدك
مادامك شَمس تَطلع في سمَايَه ما لها مَغـْرِب!
أحبك من شتاي اللي تَرَمّد في مواقِيدك
وعُمْر ٍ ولّعَت كَفْ الليَالي نَار بِه..واشتَب!
(بندر بن محيا)
