بالحلم اتعبت الخدم والسلاطين
حققت في حلمي جميع امنياتي
طقيتها عوجا وجتني على الدين
تعدّلت بالحلم كل ميَلاتي
كسبت مال وقدّروه بملايين
حبيت لي عذرا وقالت حياتي
(ماجد العبدالله الشمري)
لبّيه قالتها وانا ماندهته
وانا قبل تنده علي قلت لبّيه
يابيه موية نيلكم ماشربته
شربت من وادي وسط نجد يابيه
ياهيه لو تفنا العرب ماتركته
والله لو افنا انا وانت يا هيه
(ماجد عبدالله الشمري)
لحظه قبل لا تطلب البعد وتغيب
وتنهي معايه مرحله من حياتك
أخذ الهدايا والصور والمكاتيب
دامي خسرتك ما أبي ذكرياتك
يمكن يكون فراقنا رأيٍ مصيب
خيره .. كتبها الله جتني وجاتك
رح واترك بقلبي لك أربع معازيب
معزتك طاريك حبك غلاتك
وإن شفتني أجمع شتاتي ماهو عيب
باكر مع الأيام تجمع شتاتك
(ثامر شبيب)
