الرجل لو مافي حسابه ريال معروف
واللّٰه قادر يبدل حالك في ثانية
مايشرح الخاطر إن صكت عليك الظروف
إلا ان دنيا (البنادم) لو صفت فانية
(نايف مسدح السمين)

ويش العمر وش ميزته وش طراته
الا إنعتاق الروح من قبضة الياس
حرية الإنسان,,, معنى حياته
ماهو هروبه وانعزاله عن الناس
(الحميدي الحربي)

لا تأخذ القلب رد القلب يا قلبي
وشلون تبغى يعيش اللي معك قلبه
كانك نويت الرَحيل بقلبي ارحل بي
خُذ صاحب القلب هو والقلب وارحل به
خل الوفا من طباعك لا تمنذل بي
حدد حبيبك وحدد من تمنذل به
منك الجفا طال والولوال طول بي
وقلبي عذابك توحد به وطول به
(منصور الرمالي)

خل الرسايل وخل ازعاج جوالك
ما فيه داعي خساير لك.. ولازعاجي
خل اتصالك لمن هو لاح في بالك
ورقمك فلا عاد هو مغري ووهاجي
بقولك شي خله دوم يبرالك
كني ببعدك سجين جاله افراجي
(زبن بن عمير)

اقفت وانا قفّيت غصبٍ بلا طيب
بغيت اكملها فلاشك راحت
اقفت وقلبي فيه مثل المشاهيب
والعبرة اللي داخل الجوف صاحت
يانعبوها تطلع الشمس وتغيب
يانعبوها زمرة الشوق فاحت
انا انتهيت وتهت ياعالم الغيب
وحمامة المجروح ملّت وناحت
عفت الهوى وش عاد ابي بالرعابيب
والنفس من جود الليالي استراحت
(ناصر بن كروز)

ما نشدتك يالذهيب اللي لمحتك في يديها
خابرك بين الضلوع ولا تخيلتك قبالي
يوم قفّت بك وانا ما ابكي عليك ابكي عليها
انت ما تسمع وانا انادي بعد عمري تعالي
كلمة ياليتني ما قلتها واخطيت فيها
جعلني ما اعودها اللي سببت بفراق غالي
(بدر الظاهري)

غربة زمن.. كل من شاركتهم وقتي
مافيهم إللي لقيت الصبح بحجاجه
اللي بلا قلب واللي نفس مشكلتي
زوَّج يتامى الشموع ويتَّم سراجه
من له ضياعي.. لقيته في مواجهتي
لو باخر الارض.. مدري كيف نتواجه؟
(مهدي بن سعيد)

روض تشكله النباتات تشكيل
لاجاب نسناس العشي رايحتها
وطيورها ترسل غناها مراسيل
تبعد هجوس طالما جمّعتها
هذي طراة الوقت. ود وتعاليل
وسوالف بعض البشر ما روتها
ما تسمع الا صوت صب الفناجيل
ويدين راع الكيف لا ناولتها
يالله عسى الدنيا عليهم تساهيل
وتعينهم على الحياة وعنتها
وعسى بلدهم تصطفيه المخاييل
وتنثر عليه حموله اللي حوتها
(شاهر الظاهري)

ما غيّرك غيري حقيقة وأنا أخطيت
غريتك بكثر الغلا واحترامي
أسرفت لك بالود لين أني أحييت
فيك الغرور بلهفتي وبهيامي
ما تدري أنك بالجفا لو تماديت
تفقد غلاك وبك يقل اهتمامي
أعتاد منك الصد لا منك أبطيت
ويصير مالك عندي إلا السلامي
قبلك عطيت الود غيرك وعانيت
ومن تجربة وقتي رفعت بمقامي
طرد السراب ورجوة الحي للميت
ما تخدع إلا اللي معه قلب عامي
(سليمان السلامة)

من زان زنّا له على وضح النقا
ومن خاننا عليه مردود البرا
هاضت لك الله من صميم فؤادي
ما خذتها من صدر غيري مشترى
ومني صلاة عد ما هل المطر
وما ساق ما في كل عود أخضرا
على محمد سيد كل المرسلين
اللي عن درب المهالك حذرا
والآل .. والاصحاب وما طاف بالمطاف
واعداد ما بالكون واللي قد جرى
(عبدالرحمن بن عبدالله بن محمد الوهيبي)