أكذب عليك ان قلتلك ما عرف شي
أعرف ولكن وش تفيد الإجابة
ما فيه حيٍ ما مضى له زمن غي
ولا فيه غصاً كود هب الهوى به
أمضيت من عمر الشقى شي وشوي
يوم اتعنى به وعشر ابتلى به
حبٍ يموت وحب يبقى معي حي
وحبٍ يمر القلب مر السحابة
(عبدالرزاق الهذيل)
يالله عسى من تركني ساعة الشدّه
تحدّه ظروف وقته لين ياتيني
حتى إنّي أعطيه مطلوبه ولا أردّه
ويشوف فرق المراجل بينه وبيني
أنا رفيقي على العسرات ما احدّه
أدرى رفيقي مثل ما ادرى على عيني
وأنا رفيقي ليا شفت الزمن ضدّه
أقوم في واجبه من قبل يدعيني
وإن كان لا جاء لزومي يقدر يسدّه
وألاّ ترى العذر لا جاء منه يكفيني
ما يوجع الكبد كود البور والصدّه
من واحدٍ يقدر وما قام يسقيني
(مشعل بن سابر)
