ياللي تدق وخافق القلب لك دق
وش فيك تفصل يوم رقمي تدقه!
ياما من اجلك دمع عيني تدفق
واتعبت حالي بالسهر والمشقه
يازين قلبي من عروقه تمزّق
وصدري من هموم الدهر صار رقه
لا تكرر الغلطه ترى هـذي ابحق
والا الرقم ياصـاحبي لا تدقه!!
(عبدالله العتيبي)
الطفلة اللي بالغلا فازت بتاج المملكة
كل الجوارح أقسمت ما في محبتها شريك
شافت غلاها وآمنت من بعد ماهي مشركة
طاعت أولي الأمر وغلاها يامر بهيبة مليك
يا قوّها وقت الزعل دمي بكلمة تسفكه
سيف الزعل في يدّها روحت باسبابه هليك
واذا رضت فديتها كني خطأ تستدركه
بأربع حروف تصححه وأحيا على همسةأبيك
(عبدالله ثويني المانع)
