ماني مقصر وان تخاذلت قلي
والله لا احطك بعيوني واغطيك
من ذاق مر الحب لازم يحلي
مرمرتني في عيشتي وين حاليك؟
خل العناد اللي براسك يولي
اخاف لاتصغر بعيني واخليك
(مطيع العوني)
يا صاحبي على العطا من جبرني
اقدر على التطنيش و اخسرك واغيب
لاشك اصلي بالرجوله امرني
ما همني من ياخذ المدح ويجيب
بروح ون ضاق الزمن افتكرني
لا شان وجهك ولفحتك اللواهيب
بتقول هذا بالوجيه اختصرني
وجهٍ كفاني شر ناسٍ من العيب
(سعود الشبرمي)
واصحاب الامس اللي نسونا.. الغايبين الحاضرين
علمهم اني ما التفت لغصنها واوراقها
علم وقل للحاضرين يعلمون الغايبين
ان الأمم اخلاق تبقى ما بقت اخلاقها
وقل للوسيم المترف اللي كان مين وصار مين
اللي بدا يعرف بعيرتها ويعرف ناقها
لو يجتمع شعر الفرزدق مع أدب طه حسين
ما ترتفع روسٍ تلفِّتها سبب دِنّاقها
(ضيدان بن قضعان)
