محبتك فالوقت ذا ما تشبّه
الا بخيمة بدو بين العمارات
ان شفتني ضايق واهوجس واسبه
اخاف غدر الوقت.. والوقت دورات
لا تحسب ان دمعي نزل دون سبّه
ابكي من الفرقا وهي مابعد جات
اليوم كل امورنا..مستتبّه
وبكره ماندري وش معه من مسرّات
اربّ قلبك مثل قلبي اربّه
ما يخلفه كثر العذل والمسافات
(محمد بن فطيس)

والله مدرى ليه ضايق .. ومخنوق
واحس به نبرة بكا في كلامي
لا ..لا تهيّضني على الدمع ياموق
ادنات والله .. ما يمطّر غمامى
ياعين كانه دمع هليه ولـ فوق
ما ودى اشعر .. بانكسارى امامي
الليل كله .. لين صافحني شروق
وانا اليّل .. هالصباح بظلامي
كل السما رعد .. وبكاءات وبروق
حزن تزبّر .. فى سماي .. مترامي
بشويش تكفى لامس الجرح برفوق
كذبه تراها ضحكتي وابتسامي
ثوب الفرح..ياسيد الهم..مشقوق
شفها تراجف من لبسته عظامي
شفني نخل .. كلي عذابات وعذوق
لا لا تهزّ .. ولا تطيّر حمامي
(عارف سرور)