ياحلم عمري.. هلكت الروح
مليت وحشة مشاويرك
تقطع منام العنا وتروح
وأنا أتعذب بتفسيرك !
(مشاري البواريد)

اصعب من فراقك الموحش سؤالك
كيف حالك ؟؟ يااه ياهي منك غير
شوف احد غيرك يسألني بدالك
كيف حالك منك.. تتعبني كثير
اذكر اني الف مره قلتها لك
ياحبيبي لو يصير اللي يصير
كيف حالي مرتبط في كيف حالك
دامك انت بخير..انا مثلك بخير
(محمد الحويماني)

دخيل النظرة اللي تكتسيني بوح
دخيل الكلمة اللي اباقولها وضاعت
حبيبتي راح العمر وانامابين جروح
والضحكة اللي يوم رحتي معك راحت
زرعت الأمل بذرة وسقيتهاهمي المفضوح
وحصدتها بعد طولة غياب وردة شاحت
تلقفها ربيع العمر ورماها لخريف النوح
وردت علي بتالي العمر مثل ماراحت
تصدق وردتي مثلي صارت بليا روح
خذلها عشب الزمان وانا خذلني شكلها الباهت
(غير معروف)

لا ضاق خلقك وشفت منهو يداريك
بلغ سلامي له ولو مذهبه سيخ
بعض الرفاقه تنتخي بك وتجاريك
والبعض الآخر عرفهم لك توصيخ
احرص على الطيب وخله يباريك
وابعد عن الخايب لوكان ولد شيخ
(فهد الماضي)

توجعت في صمتي لأن الكتابة نوح
نسيت القلم والا القلم صعب ينساني
ما بين أفضحك مستور والا أسترك مفضوح
بكى دفتري يا قاهر الصمت وابكاني
أبيعك بليلة غاب عنها القمر للبوح
ويشريك من نظراتهم طول كتماني
أعلي جروحك فوق لا طيحوك جروح
وانزلك وإن ضاق الفضاء فيك وجداني
أنا من معاذيرك وأنا المخطي المسموح
ومن قبل تخطي طالتك يد غفراني
خطاك البحر يا عذب منك الخطأ مملوح
خطاي إني الغرقان والموج يجفاني
لك الضحك ما دام الليالي عتب ومزوح
ولي الدمع لا غابوا عن العين خلاني
كتبتك وكني نازعك من حشاي الروح
قريتك ولكن الورق فيك ملاني
(سعد الحريص)

لا تتكلم في سكوتك.. اسمع اللي تكتمه!
وفي كلامك افهم اللي في سكوتك تستحيه
(بدر محمد الوحيشي)

طافك قطار الود ما عاد يمديك
وقت الرضى يامشغل الناس فاتك
(مبارك رشيد)

صب لي فنجالٍ اشقر من الدلة
من يدين اللي عشاني مسويها
لو بيديني اشرب اللي بها كله
الحلا فيها من اسباب راعيها
(مبارك رشيد)

ابشرك من بعدك.. النوم سلطان!
ماعاد لي في تالي الليل حاجة
(مبارك رشيد)

ما قلتلك هالقلب مافية حيلة
اليا عشق مجنون.. ياتي من اقصاه!
(مبارك رشيد)