على الله اتكَلت الشون كله وانا لله
من الراجعون إليه بالعز والذلة
الله يقطع الحاجة ومشيٍ بلا مشهاه
والله يقطع اللي كلّ من قاربه ملّه
والله يقطع اللي لا بغيناه ما نلقاه
والله يقطع اللي لا صفا .. ما صفا كلّه
(سعد بن جدلان)
ماتفهميني..صعب يفهمني إنسان
خيالك أصغر من غموض ٍ لثمني
يابنت أنا أصعب مفاهيم الألوان
طريت في بال الزمان ورسمني
لوحة مشاعر خيّبت ظن الأشجان
تخيلي حتى الزمن مافهمني !
(مشاري البواريد)
راجع بشوقي ولهفتي من غربتي
راجع لربعي وديرتي ومحبوبتي
داير بعيني الحايره وسط الزحام
ودي ألاقي عيونها وأبدى معها بالكلام
في لحضه طلت من بعيد
مزيونه واحلى من القمر
وفهمت منها ماتريد
وانا بشوقي انتظر
يا فرحتي محبوبتي
نساني قربك غربتي
(غير معروف)
ثقلت خـطاي وكنّ الايام فوقي
صخر الجبال وتحتي الرّيح والعجّ
لا والله الا صار ما ارجيه عوقي
غير الذي عن طلبته ما تحرّج
يا الله يا مضوي السّما بالبروقي
ويا مخرج ٍ وبل السحابه من اللجّ
تـمطرني برحمتك وتفكّ عوقي
وتجعل لي من الضيقات والهمّ مخرج
(بدر بن عبدالمحسن)
واليوم خمس سنين والهم ما زاح
هم الفراق اللي بلا عـذر مشـروع !
استغفر الله تسعة شهور يا صاح
في غيبتك قمت احسب اليوم باسبوع !
ضاع الحساب وشفت برق الجفا لاح
وأيّست لولا ان الرجاء فيّ مزروع !
(محمد بن فطيس)
ارفعي سهم المنايا يالعيون
مابقى فيني مكان للطعون
كل شبر في حياتي انجرح
و الذي شقّوا خفوقي يشتكون
في عيوني دمعتين واقفه
ردّت الأيام دمعي بالجفون
ارحمي قلب تجاريبه قست
في زمان ماعرف يوم حنون
اللسان يخون و البسمه كُذُوب
وأصدق التعبير نظرات العيون
(خالد الفيصل)
