أكذب عليك ان قلتلك ما عرف شي
أعرف ولكن وش تفيد الإجابة
ما فيه حيٍ ما مضى له زمن غي
ولا فيه غصاً كود هب الهوى به
أمضيت من عمر الشقى شي وشوي
يوم اتعنى به وعشر ابتلى به
حبٍ يموت وحب يبقى معي حي
وحبٍ يمر القلب مر السحابة
(عبدالرزاق الهذيل)
يا زايره بعد مل الشوق والإنتظار
وشلون جيتي بعد طول الجفا زايره ؟
ياما خذتني مواعيدك لكل الديار
لفيت الأقطار خلف وعودك البايره
وياما حزمت الحقايب من مطار لمطار
وياليت في الكون شي أسرع من الطايره
تقبل وعودك وتشعل داخل القلب نار
وتقفي وتترك بعيني دمعةٍ حايره
(عبدالله بن علي الطلحي)
