مشاركات بواسطة زيزفون

كم كان لي شيطان

كم كان لي شيطان اصبح كالشقيق
وكم شقيقٌ صار شيطانٌ مَريد
وشو له اوجع خاطري وازعل واضيق
من عالماً ما تستفيد ولا تفيد
انا اشتري لايق بعشرة ما تليق
عشرة مشکّل من قريب ومن بعيد
لا بار بي غیدٍ فأنا حر طليق
غيره على ارض المملكة مليون غِيد
ولا بار ابن عمي ولا دَل الطريق
ماني بلا ميت ولا عايش وحيد
احذف ولد عمي وادور لي صديق
واخزنه عندي ولد عمٍ جدید !
(محمد الغبر)

فتحة الباب

لاصرت منت بكفو لفَتحة الباب
صكه وخل اللي كفو يفتحونه
اللي معزز طيبهم .. طيب الانساب
متوارثين الطيب .. و يورثونه
يقضون حاجات القريبين وأجناب
المال قبل الجهد .. ما يذخرونه
لأرزاق خلق الله تقل خلقوا اسباب
يقرون حاجات الخوي ... من عيونه
منفذين المال ماهم بهيّاب
لو كان بعض أيام ما ياجدونه
ما الهاهم الواتس اب ومتابع سناب
مجلس رجالٍ والحكي يازنونه
وعيونهم للواجب مزارق حراب
من خوف لا يلحق مسير مهونه
ما فرقّوا بالناس من حيث الأنساب
حتى الضعيف بطيبهم ينهضونه
(حمد السعيد)

ما شاء الله

ما شاء الله وش ذا الوجه وش ذا الجسم
عسى عيون الحِسد عين آنيه
لبّى الملامح والحجاج المرتسم
اعجاز علمي ينقرا علانية
سبحان من ركبك من دم ودسم
اللي سواتك ينحفظ في آنيه
الله عطى العالم قَسِم وانته قَسِم
قطعة من الجنة على ارضٍ فانية
(محمد الغبر)

عاد أنت توحيني؟

ليتك عن مطاول سهر ليلك امرحـت
وكسرت عن جفن السهـر لا يطيحـي
عاد أنت توحيني؟ ياليتـك تريّحـت
يوم انت لا نـدِّي ولا انـت بنطيحـي!
(عاقل الزيد)

ما طحت من جنة

اذا على بالك .. بيهزمني اهمالك
موت الغرق ابرك ولا اضما على جالك
ما طحت من جنة اذا طحت من عينك
قدري هو قدري بفرقاك ووصالك
الجرح بالجرح وجفاك بجفا ونسيان
انا لنفسي وانت بتظلّ لامثالك
(احمد الردعان)

ما للفقارى بني عم

يا صاحبي ما للفقارى بني عم
يوم الغني كلٍ يجيك ابن عمه
محدٍ طمع بالمدح في ديرة الذَم
كلٍ يبي المخراج من كِبر هَمه
ومن لا تثيره غِيرة الدين والدم
سمّه على ما يشتهي الوقت سمّه
لا صار ما هو حِر ابن حر ..حِر أم
بعض العرب ما يِلحق رشاه جَمّه
ياصاحبي والمدح لا زاد كالذم
الثوب ما يستر اليا عاب كِمه
(مساعد المغيري)

يا مطر

يامطر جيتك وانا قَطرة مويه
يابحر جيتك وانا ضِفّة نهر
ياسيدي سلطان يالحر النزيه
لي سؤالاً حير(ن) طول الدهر
الرجل لاضاقت الدنيا عليه
يزبنك والاّ يموت من القهر؟!
(شاعر شمري)

لا ضاق صدرك

لا ضاق صدرك والليالي تحدتك
اصبر عليها والصبر زين لو طال
واحذر تدور عند الأنذال حاجتك
لا تقضي الحاجة ولا تستر الحال
واحذر تبين لأقرب الناس شدتك
لو تزعله لحظة حكت فيك الأجيال
وان صرت ضيف الناس لا تطول مدتك
غالي تجي وتروح يا طيب الفال
وان كان همك بالزمن بس لقمتك
الفول بريالين والخبز بريال
(سعد بن جدلان)

أهواه ولا أتعبدهُ

صنمٌ للفتنةٍ منتصبٌ
أهواهُ ولا أتعبَّدُهُ
صاحٍ والخمرُ جَنَى فمِهِ
سكرانُ اللحظ مُعرْبدُهُ
ينضُو مِنْ مُقْلتِه سيفاً
وكأَنَّ نُعاساً يُغمدُهُ
فيُريقُ دمَ العشّاقِ به
والويلُ لمن يتقلّدهُ
(الحصري القيرواني)

بياض الوجه

تراك مازلت تتبعنا على الجِرّه
من عاد حنّا على ظهور البعاريني
قومٍ يدينا تحوش المال وتثرّه
على بيوت الارامل والمساكيني
لو نملك الكون من بحره ليا برّه
ما نمتلك به عمارات ودكاكيني
وان كان نفسك من المليون منغرّه
يكفيك .. وأنا بياض الوجه يكفيني
(سلطان الهاجري)