عروقي خميلة

أطوي الجديلة في كفوفي وهي ليل
ولا من طويت الليل صار الجديلة
حلمٍ جمعني فيك ما كان بالحيل
حلمٍ ولكن شوفتي لك قليلة
ناديت لك لين إسمعتني المواصيل
واشتقت لك .. كن العمر صار ليلة
ولمستك بروحي .. وكانت قناديل
أصابعي .. والقلب نار.. وفتيله
ما هو غريب .. أبتل من جارف السيل
لا شك ينبت في عروقي خميلة
(بدر بن عبدالمحسن)

الهرج

الاحسان يابن عبيد يجزى بالاحسان
والشر تنطحه الوجيه الشريره
ماقَل دَل وزبدة الهرج نيشان
والهرج يغني صامله عن كثيره
(راكان بن حثلين)

افتني ياشيخ

‫مير افتني ياشيخ .. من افضل؟ جزاك الله خير‬
‫مادري الغني والّا فقير الحال؟ ياشيخ افتني‬
‫هو الغني اللي يزكِّي بالسنة مرّة فقير؟‬
‫والّا الفقير اللي قضى عمره زكاةٍ للغني ؟‬
‫(محمد الدحيمي‬⁩‬)

الصاحب الطيب

الصاحب الطيب بالاخلاص جازه
واحرص على اللي سمعته ترفع الراس
وإن كان تقدر لاطلب منك عازة
عطه الطلب تقدير لا تطوي الياس
(بدر الحويفي)

الحابل والنابل

إليا اختلط حابل ذنوبك مع النابل
قل: يا كريم، وتنصّى يمّة القِبله
الله غفور ورحيم وللدعاء قابل
والتايب اللي قرب لله يقرّب له
(محمد الذرعي)

غريب الدار

غريب الدار ومناي التسلي
أسلي خاطري عن حب خلي
سمعت الشور من قاصر معرفه
يحسب البعد عن داره يسلي
(خالد الفيصل)

يا وسيع البال

يا وسيع البال .. ضيقت الصدور
رحت ما علمتني .. وين أنت ساري
في غيابك .. ما لخلق الله حضور
وفي حضورك ما لهم بالبال طاري
(متعب التركي)

يا نفس

‏يا نفس مايرخص معاليك عوفيه
‏لو كان مردوده غناة ومسرة
‏ثوبٍ يعرّي .. ما سترك بمخابيه
‏وجوعٍ يعز النفس .. لله دره
‏(محمد العفيصان)

يا شقي القلب

يا شقيّ القلب لا أوحيت الأذان
قبل لا ترتد نفسك ردّها
ما تصلّي غير في شهر رمضان
تبني الحسنه شهر وتهدّها
(سداح العتيبي)

رفيق يحد السيف ..

يا رفيق يحد السيف ويسله
كل ما اقفى رفيقه حش عرقوبه
رفقة مالها مذهب ولا مله
يالله العفو و الغفران و التوبة
(سلطان الهاجري)

12345الأخير ›