راحوا ورحنا ..

راحوا ورحنا ماتبعنا المقفين
لو ان روحتهم علينا صعيبة
لكن من يرضى على نفسه الشين
يتبع ثرى المقفين في كل غيبه
(حمد الحربي)

انوارها سكانها ..

إثر البيوت انوارها سكانها
ماهي بزخرفها ولا بنيانها
بيوت مرفوعة وترفع من زبن
ياسعد عين اللي زبن باركانها
وبيوت لا جتها الخلايق تنكسر
لو كان من صافِ الذهب عمدانها
وبيوت لا جتها الخلايق ترتفع
لو كان ماتلقى عشاء ضيفانها
يالله عس الطيب يجي دايم قوي
ولا تالي كرام العرب رديانها
لأن الكريم ليا قوى .. ربعه قوو
واهل الردى تكبر ويصغر شانها
(سعد المطرفي)

ظبيٍ نطحني

ظبيٍ نطحني يجر الغيّ ويل امّه
مثل امي انه عذاب الروح مثل امي
عليه لبّسني ابليس الهوى عِمّة
وابليس من قبل ابن خالي وابن عمي
يا ليت من هو تلّين في طرف كِمّه
اليا تمدّد طرف كمّه على كمّي
غروٍ ذبحني وانا من لحمه ودمه
وش بقّى للّي ما هو من لحمي ودمي
لا جيت اخمّه وقلت الخمّه الخمّه
قال ابتعد يا ولد بدري على خمّي
ما يدري انّه خبر إنّ وانا ضمّه
يا حلو حلو الخبر مرفوع بالضمّي
(ناصر الفراعنة)

يا معجبة

يامعجبة قفلي وانسي تليفوني
انا على خوتك ماعاد يمديني
ان كان لك في الهوا شوط ماراثوني
لي في اوله خطوة وحده وتكفيني
بيني وبينه يكون الله في عوني
مثل مابين اليهودي والفلسطيني
سميه حرب او ضياع او فلم كرتوني
لا الدم دمي ولا السكين سكيني
(فلاح القرقاح)

شريت ببكاي

من كثر ماضاقت من احبابي عيوني
ماعاد شفت الطريق اللي يوديني
شريت ببكاي ضحكتهم وبكوني
إلا احرقوا دم قلبي في شراييني
مروا علي مثل الاشباح وتعدوني
لا ضيعوا عقلي ولا غيروا ديني
صديت عنهم ورحت أمشي على هوني
وأن جيت أدورهم الله لا يحييني
من رخصهم لو من دموعي شحب لوني
مع كل دمعه يطيح أثنين من عيني
(فلاح القرقاح)

سنين البطا

ياعاشقة ثوري معي
في وجه ظالم و اعدلي
من حرم ايام اللقا
ما حلل سنين البطا
(عبدالله علوش)

الطيب

عجزت أداري خاطر فلان وفلان
الطيب في بعض الأوادم خساره
من أولٍ والطيب يشرى بـالأثمان
واليوم صار الطيب غبن ومراره
(عز القصيد)

العلم نور

العلم نور ولا يجيك النور إلا بكهربا
والكهربا خطرة اذا تلعب يصيبك إلتماس
والجهل ظلمة ليل .. ياهو من تغيبي أو غبا
لذلك المرء ان جهل حاجة يحاربها بحماس
والصبر مفتاح الغنيمة والغنيمة ما تبا
إلا صميدع يقلب الدنيا بعقل وقو باس
(فهد الصعيري)

بحر غمسني غمس

أحبك محبتي للعين أو أكثر زياده
من داخل الروح غيرك طامسه طمس
ليل الغياب من غيرك بدد سواده
معك الحياة الجميله كنّها باديه أمس
جمال الورد يتولّد من خدودك ولاده
نظرة عيونك آه... بحرِ غمسني غمس
(عبدالعزيز ملاوي)

الخايب

الخايب اللي ماعرف سكة الطيب
ماهوب كفوٍ في المجالس يقَلط
جاهل ولا يدري بحقوق ومواجيب
دايم على ربعه عذابٍ مسلط
(عبدالله السهلي)

12345الأخير ›