بغضك رميته بين سبع السباعي
وحبك زرعته في ضميري زراعة
إن كان ناسي لك خصيم يداعي
اذكر زمان فيه كنا جماعة
وكانك قطوع وعندك السر ضاعي
رد الوداعة,, لا تضيع الوداعة
(خلف بن هذال)
إن قلت أجيبه,, والله إني لا أجيبه
عذب الكلام وحنظلة عند راسي
والعادة إني ما احب الغليبة
باللعب أشوش,, ويمكن أكون قاسي
والضربة اللي ما يداوي صويبه
غصب يتذكرها إذا كان ناسي
(سليمان الصقير)
راعي الهوى يفضحه صمته ووناته
مع الهواجيس له سجات وعناقي
والحب جارح وله ناسه وحزاته
مثل القنص ما يقدِّر عَنوة الشاقي
والصيد سهل على حزات غراته
والا تذير تعذر عنه ملحاقي
(سعود بن عبدالله)
قلبي اللي ما هقيت انه عن الحدب يتبرى
ما يعرف الخوف طبع له ولا الذله سجية
يوم شافك يا العيون السود روح ما تجرا
مستكن اربع ردينيات وأثنين ازورية
(سعد بن صياد اليامي)
ويا صبر صبري والعواذل يحسبون
اني دلهت من الهوى والا سليت
اسكت عساهم من سكاتي يسكتون
وانا عن اللي في ضميري ما انتهيت
وادور الفرحه مع اللي يسهرون
وان ذكروني خذت فنجال وسريت
اخذت من وقتك يا دكتور العيون
عالج عيوني لو بعد طبك عميت
واستر علي واللي معك لا يفطنون
انت الوحيد اللي بعد ربي دريت!
(محمد بن فطيس)
