ولا تامن الايام يا جاهل بها
لو هي جميلة لا يغرك جمالها
كم واحد يركض وحصيله التعب
ما حاش منها غير بالي سمالها
ما كل شي بالتمني تحققه
ولا كل شي تطلب النفس جالها
وقولة نعم ما كل واحد تجيله
ولا كل من يبغى المراجل ينالها
(أحمد بن مشعان المطيري)

تكلم قل احبك,, قل عشقتك,, قل محال اجفاك
وامانه فكني من كل عذر وقولة ظروفي
ابـكتب لك بياض وفيه تقرا كل ما يهناك
وبـسولف لك سكوت ومنه تسمع اخر حلوفي
تطول السالفه وانسى مجيك واجلس استناك
واصب اخر فناجيل الغلا وأوادع ضيوفي
(عبدالمحسن بن سعيد)

الخوف كل الخوف من عمري الجاي
بحرٍ بلا مركب امان ومواني
تلعب بي امواجه,, وش الموج لولاي
لولاي ما هاجت بحور ومحاني
غصبٍ علي ولا امشي الوقت برضاي
والا مكاني,, مو هنّيا مكاني
(منصور الحربي)

حالمة لا يجف بشفاهك كلام
ليلتك ترنيم وألحان وحدوْ
ما عرفتي وين قلبي يا حرام
ساكنه ضلعين وبيوت وبدوْ
(ابراهيم عبدالله الضالع)

ولا تقول اني القاري على كل داب
ما كل سيَّات الأرض بينقري دابها
(زبن بن عمير)

أبعد عن النمّام خيره وشره
ليا شافله غرّات جالك يلالي
يضحك معك والقلب فيه المضره
يفرح ليا صابك من الدهر والي
ينقل خبرك بزايد الفين مره
ما عنده أحساس ولا هو يبالي
يسعد ليا شافك مصاب ويسره
الى أبتليت وصار لك سوء حالي
(مبروك النامي)

كم كان لي شيطان اصبح كالشقيق
وكم شقيقٌ صار شيطانٌ مَريد
وشو له اوجع خاطري وازعل واضيق
من عالماً ما تستفيد ولا تفيد
انا اشتري لايق بعشرة ما تليق
عشرة مشکّل من قريب ومن بعيد
لا بار بي غیدٍ فأنا حر طليق
غيره على ارض المملكة مليون غِيد
ولا بار ابن عمي ولا دَل الطريق
ماني بلا ميت ولا عايش وحيد
احذف ولد عمي وادور لي صديق
واخزنه عندي ولد عمٍ جدید !
(محمد الغبر)

لاصرت منت بكفو لفَتحة الباب
صكه وخل اللي كفو يفتحونه
اللي معزز طيبهم .. طيب الانساب
متوارثين الطيب .. و يورثونه
يقضون حاجات القريبين وأجناب
المال قبل الجهد .. ما يذخرونه
لأرزاق خلق الله تقل خلقوا اسباب
يقرون حاجات الخوي ... من عيونه
منفذين المال ماهم بهيّاب
لو كان بعض أيام ما ياجدونه
ما الهاهم الواتس اب ومتابع سناب
مجلس رجالٍ والحكي يازنونه
وعيونهم للواجب مزارق حراب
من خوف لا يلحق مسير مهونه
ما فرقّوا بالناس من حيث الأنساب
حتى الضعيف بطيبهم ينهضونه
(حمد السعيد)

ماتت رجاوي هقوتي بالنّاس
‏واذا على الخذلان ... للهاوي
‏شبعان كذب و لا عليّه باس
‏ارحل مدامك للجفا ناوي
‏فلا انت همّام ولا انا جسّاس
‏حتّى تراب الزير متساوي
‏فاذا تبي منّي ادقّ الكاس
‏خلّك مع الهجران متخاوي
‏الفقد من طبعه بدون احساس
‏والحزن ما يرحم ولا ياوي !
(يوسف السالمي)

ما شاء الله وش ذا الوجه وش ذا الجسم
عسى عيون الحِسد عين آنيه
لبّى الملامح والحجاج المرتسم
اعجاز علمي ينقرا علانية
سبحان من ركبك من دم ودسم
اللي سواتك ينحفظ في آنيه
الله عطى العالم قَسِم وانته قَسِم
قطعة من الجنة على ارضٍ فانية
(محمد الغبر)