أبيات القصيد - أجمل أبيات الشعر العامي

واللي بلاه النصيب بحب رعبوبه
راحت من ايده وقلبه بين أياديها
يبطي ونفسه عن اللذّات محجوبه
ويندم على الساعة اللي شافها فيها
(فلاح القرقاح)

أخفي عن العالم معالم محبتها
وأنا والله إن حالي من الصد منكوبه
جروح الهوى تبرى وتبرد حرارتها
ليا حصل الظامي من العِد مشروبه
(شبيب بن شاهر)

الكل يبخص في الشدايد خراجه
لا نشبت اللقمة من الغبن في الزور
والحظ لابان الردى في حجاجه
أصبر مدام الصبر ياخوي مقدور
(عبدالرحمن المجلي)

قلبه ليا شاروا هل العرف سمّاع
أخذ من الأريا ثمرها بلا بيع
وكثر التجارب درس والدرس نفّاع
فيها لذربين الرجاجيل ترفيع
(مرشد البذال)

من شب نار الشوق ياشوق ماصاح
واللي وطاها يشرح الجيب ويصيح
لولا الغلا ما هانت النفس ياصاح
محبتي لك ما وراها مصاليح
(عبدالله العليوي)

نارد قراح الماء ونترك هماجه
هذا لنا مبدأ ومنهج ودستور
واللي يطفي في الغداري إسراجه
لايحتري قمراء ولا يرجي النور
(عبدالرحمن المجلي)

الحر يزكي .. والدجاجة.. دجاجة
وماني على بعض المقاريد مجبور
الضرس, قلعه لا تألم علاجه
لا صار ما ينفع معه طب دكتور !
(عبدالرحمن المجلي)

احذر تصير لمن وثق فيك خداع
ترى أقشر الحالات حال الخداديع
الخدع لو راعيه بالزود طماع
تراه مثل زراعة مالها ريع
(مرشد البذال)

أعيش عيشة ذيب والراس مرفوع
وان قل مالي عز نفسي غناتي
(رشيد الزلامي)

دنياك لوجادت بعذب المشاريب
بنكباتها من علقم المر تسقيك
خلك حكيم وحافظاً للمواجيب
واحذر عقاب اللي يميتك ويحييك
(سايل بن لافي)