أبيات القصيد - أجمل أبيات الشعر العامي

يا كم بنت هامل.. جا ولدها بطل الابطال
وكم بنت شيخٍ جا ولدها قصير ايدين
(علي بن حمري)

كنت اتمناك لو مريت في بالك
تذكر عهود الوفا في وقتنا الخالي
وتذكر ليالي هوانا والبخت سالك
من قبل يصبح بختنا كاسد وبالي
(سليمان الشاردي)

حاز المراجل والمراجل كليفة
إلا على اللي كل مارامها هاش
وان شاف له من جانب القوم خيفة
تلقاه للخيفه مهاجم وبطاش
(مطلق بن حميد الثبيتي)

أحبك بس ماربي موفقني تحبيني
واقفِّي بس ماربي مقدّرني على النسيان
(إبراهيم الوافي)

الليل ما مل التعب في حياته
دايم يشيل الصبح ما تعبت ايديه
يا حظ منهو بالمحبه سواته
لا من خذا شيٍ من الحب يعطيه
(سعود بن عبدالله)

اعوذبك من كسرة الحظ يالله
عونك ولا عون الوجيه المفاليس
اعوذبك من موقفٍ يتعب الجاه
واعوذبك من شهوة النفس وابليس
(خضر البقيلي)

ترى الرفاقة كيف ما هيب بـ الكم
رفقة وفيٍ خير من ثلث الأمة
ما كل من جاوب صدى صوتك بسم
يغليك ولا أنك حقيقة تهمه
(عبدالعزيز الشهيل)

نِشْرب من الهم همّ ونرجع نفاخر
وعلى الورق نرسم الدنيا بلا ضِيقه
وانا الذي حالتي تصعب على الكافر
مجبور بالصبر لو الصبر ما اطِيقَه
(ناصر السبيعي)

وسادتي جرح الغلا والعنا لحاف
والشوق دمعاته تواسي حنيني
يأخذني الهوجاس في كل مشراف
واخفيت همي بين قلبي وبيني
(عبدالله داود العصيمي)

فيض الغلا اللي مع عروقي يوسّمها
ادري به انه يفيض بوسط خفاقك
والروح تدري وش اللي دوم يألمها
اني حقيقه ترى مقدر على فراقك
(عبدالعزيز صالح العوض)