اسامحك إي والله الا بسامحك
وأعذرك لو كلك خطايا وأحبك
كان الخطا منك أنا اللي بصالحك
وأنا ترى المخطى ولا هوب ذنبك
مملوك لك والعمر كله لصالحك
وأمشى معك من وين ماكان دربك
(علي مساعد)
قبل تشكيلي وتبكي
قبل لاتبدى وتحكي
ابسألك ليه الخيانه
ليه تخدعـني وتبكي
يعني متعود تخـون
او هو ذا طبعك يكون
تشتكي بدمع العيون
وعندك اسهل شي تبكي
(يوسف الخلف)
جار الزمان ولوع القلب تلويع
وصارت بـلاوي دنيتي تمتحني
يالله دخيلك طالبك قبل لا اضيع
تاخذ بيديني وتبعد الهـم عـني
الحزن قطعني على شكل تقطيع
صار الحزن ياخذ تواصيف مني
(يوسف الخلف)
والله ماغيره من الناس يسواه
خلّي واحبه كثر عيني واقوى
خلّي ولوطال الزمن ماتناساه
دايم على بالي ولاعنه سلوى
ولو مابقالي معه ياكود ذكراه
لاقول هاذاك الشقا معه يسوى
اثر الهوى ياناس كله معاناه
واثر الهوى في كل الاحوال بلوى
(بدر المحنا)
