لو بغيت أسلا غرامه ما قويت
حيث في حبه حياتي من ممات
قلبي الموجع يردد ما حييت
إكتم الشكوى وعش بالذكريات
في مجال الحب يكفي ما خذيت
إقبل الواقع ترى ما فات,, فات
(عبدالله الفيصل)
يالله لا تجعل نصيبي على جال
جرفٍ ليا قرّب له الماء يليني
يالله لا تكتب لنا شين الأعمال
يا قابل التوبة من التايبيني
يالله لاتقرن حياتي بالأنذال
اليوم ولاّ مقبلات السنيني
يالله لا تملا يديني من المال
إلا بقدر العيش والغانميني
(فيصل الرياحي)
يازين شوف البر والجو هادي
والروض مخضر فيه من كل الازهار
في صحصحٍ شفي وغاية مرادي
ولا وطاه من المخاليق مرار
تبعد همومي كلها والنكادي
ويسلى الضمير اللي من الوقت محتار
هذا هواي و مايسر الفؤادي
شوف الفياض اللي لها القلب يختار
(نواف الصخابره)
قالت : ترا بنت البدو حظها مال
قلت : احذري حذرا تكوني جهوله
بنت البدو يا بنت مضرب للأمثال
فوق الجمال و طاعة الله خجوله
ما حطت اصباغٍ و لا حطت ظلال
و لا سيّرت بالسوق سير مهبوله
هي مهرةٍ تصعب على كل خيّال
و انتي و مثلك عسفهن بالسهوله
(غير معروف)
