محطة قطارات
يمه طلبتك والغلا ما بعد مات
وش هو لذيذ النوم يا ذاكرينه
قالت: زعيم الشوق يضرب غرامات
مشتاق والمشتاق.. ربي يعينه
صدرك غدى كنه محطة قطارات
سقفه خشب بدموعنا داهنينه
في كل ركنٍ منه تلقى حكايات
هنا مطيح اللي ملى الدمع عينه
وهناك وردة عينها للسماوات
ترجي كَرم مزنة لو الورد زِينه
وهناك بنتٍ يتمّتها الطموحات
عاشت تبي حلم وغدت به سجينه
وقلبك غدى صالة قدوم المطارات
مليان شوق وناس ماتت غبينه
(يوسف السالمي)
