لا تحسد الأمير..

ومن جرب الحاجة وروحه كسيرة
يفرق عن المرتاح .. وابو الملايين
لاتحسد الأمير ،،، وإلا الاميرة
وأوصيك لا تضحك بناسٍ ضعيفين
ولاشفت وجه المبتلي ،، لاتثيره
افزع له بدعوة ،، وحث المصلين
(مبارك الحجيلان)

الرضا ماله صديق

الرضا ماله صديق ليا زعل غير العتاب
والعفو ماله عذول الاّ ملام المقدره
كيف يالتوبه حضورك يبري جروح الغياب؟
واطهرك ذنبٍ يصك الباب دون المغفره
يا بْعدي والظن ظنّ ولو فتق صدر الصواب
وابسط اقدار المنايا.. كلّ جمع تبعثره
(محمد الدحيمي)

كل حصني ..

المصيبه لا رمى الفارس بصدره للحراب
مادرى انه كلّ حصني في بلاده عنتره
(محمد الدحيمي)

أحاسيس صرعى

ياللي فراشك عين وغطاك من رمش
لك في مروج القلب مورد ومرعى
الهم مخلابه خمش مهجتي خمش
وفزّت عيوني من مفارقْك هرعى
أمشي معك من وين ماقلت لي أمش
صاحي واحاسيسي من الشوق صرعى
(عوض سلامه العنزي)

غيمة وهتان

كم لك تمرّ أرضي بغيمة وهتَّان
ولا سقيت أرضٍ تحرّت سحابـك !
وأنا لو إني في مكان السحب كان
فلَّيت مجدَّول المطر في ترابك
(غير معروف)

المطر .. لمّة أحباب

الجو غيم .. وخابرك تعشق الغيم
دايم تقول إن المطر .. لمّة أحباب
بدلت بغيابك جميع المفاهيم
صار المطر يبكي على لحظة غياب
ياصاح من عقبك تجرعت انا الضيم
والليل غير الهم والضيق ما جاب
يا ابعد الاقراب شوف المطر ديم
الجو طايب .. لكن الفكر ما طاب
(نايف الرشيدي)

صعبٍ عليَّه وانا ابيه

قلت البكا.. صعبٍ عليٌه وانا أبيه
لا واهني اللي بكا وما تندم
لي عبرةٍ يلعب بها الحزن والتيه
ولي صرخةٍ وأتعبت أبا القى لها فم
احساس لا أبيعه ولا نيب شاريه
مَرٍ يجي شهدٍ ومرات علقم
إلى لمحتي دم جوفي افخليه
على الورق.. لاصار روحك تألم
(بدر بن عبدالمحسن)

منَّول و اليوم غالي

انه منوَّل و أمس و اليوم غالي
واتلى زمانه بالغلا مثل مبداه
لا ابطيت ماشفته وهو ما عنالي
عفت المكان اللي يغيظه ويجفاه
شوفه دواي و قِل شوفه زوالي
حكيم طب جامعٍ داه و دواه
(سليمان بن شريم)

الاخو ..

واخوي يا اللي يم (قارَة خَفَا) فَات
من عاد من عقبة بيستر خَمَالي؟
ليته كِفاني سُو بقعا ولا مات
وانا كفيته سُو قبرٍ هَيالي
وليته مع الحيين راعي الجمالات
وانا فداً له من غبون الليالي
وآ اخوي يا للي يوم الاخوان فَلاّت
من خِلقته ما قال ذا لك وذا لي
(شالح بن هدلان)

طلسم حكيم

وبرقه على كبد السما لا فلجها
طلسم حكيمٍ كاتبٍ ذروة علاج
(سعد بن جدلان)