أبيات القصيد - أجمل أبيات الشعر العامي

كثير الناس يوريك الصداقة
بهرجه مار قلبه ما صفالك
صديق بالرخا يضحك بوجهك
ولكن بالقسا ماله ومالك
(عبدالله علي بن صقيه)

تاخذك الايام وتـوديك وتـردك
يخونك الوقت وتعود علي الوافي
ياطول ركضي وراك وياكثر صدك
ماكنك اللي سلبت العقل ياكافي
(ضيدان المريخي)

احذر دروب الحرام إن ضاق درب الحلال
اصبر والانسان رزقه لو تأخر يجيه
(علي الضوي)

العز عز الروح ماهو بالاموال
والطيب طيب الذات رفعه وهامة
والفقر فقر الفكر مع مَر الاجيال
يامن تحْسَب الفقر عيب وملامة
(مازن العوني)

مايغث الشجاع إلا كلام الذليل
ولا يغث الكريم إلا قليل الحيا
(احمد فرج الاسلمي)

لا تقطع ارحامك ويشملك الوعيد
ولا تخسر الغالي ولا ترخص غلاه
واخوك لا تخسره لو انه عنيد
يخطي مية مرة وتسمح له خطاه
(عبدالله الطلحي)

انا الفقير اللي بعد حبك امير
وانا الامير اللي فقربي رجائي
وانا الثقيل الممتلي صدق تعبير
ومعاك احس اني شقي ومرائي
(سعد علوش)

انت الفرج في عتمة الليل والضي
وانت الامل ماغاب عني بريقه
يارب غيرك ما لنا عندهم فَي
ناسٍ على المضيوم ضيم وحريقة
(حمزة الهاشمي)

من غير حتى كلمتين عـتاب
ومن غير لا أدري كيف ودّعته
كان بحياتي كل شيء وغاب
كان أجمل دروبي وضيّعته
(عبدالقادر متعب)

يا عاشق الصمت بيبان الحكي فضّه
ادخل بها يمكن الأحزان تنساني
مضى الزمن بالحكي والسالفه مضّه
ما باقي إلا أنت والا عشت وحداني
(هلال المطيري)