أبيات القصيد - أجمل أبيات الشعر العامي

من لا يودك لا توده فتندم
جنِّب وخل النذل في مجلس أمه
من نم لك عند المخاليق بك نم
وركّبك عيبٍ منت حوله ويمه
(عبدالعزيز الشهيل)

قال أنا عند ظنك قلت لابِله
اختلف فيك ظني نوبه ونوبه
قال واللي سواتك يدمح الزله
قلت والغلطة اللي منك محسوبه
(سلطان الهاجري)

عشان ماضيك الجميل وعشاني
حاول تشيل من الوفا ربع ماشلت
ماني على خبرك حبيبي تراني
حتى عن صغار الاماني تنازلت
(متعب التركي)

لي في غرامٍ فات كلمه وميقاف
لولا خفوقي هام بك ماوقفها
اول غيابك قلت مابي خلاف
واليوم شف حالي.. غيابك تلفها
(متعب التركي)

العفو يا مولاي والمغفرة منك
زحزح عبيدك عن لهيب السواعير
يا رب زحزحنا عن النار والضنك
يا من يجير ولا عليه أحدٍ ايجير
(عبدالله بن محمد السياري)

ساير زمانك كان لك قلب وضلوع
وارج الفرج بايامك المقبلاتي
وان كان ما طاعتك خلك لها طوع
ما انته بضاربها برمح الزناتي
(رشيد الزلامي)

الفرق ماهو باللحى والاشانيب
الفرق بين الناس فرق الفعولي
كم واحدن تحسن به الظن ويخيب
السن يضحك والفؤاد معلولي
(لافي حمود الغيداني)

مع رفقة معهم تزين السواليف
ربعٍ على ما قيل ( آخر حلاوه )
ما يعرفون الكذب والحقد والزيف
وجلساتهم ما بين ذكر وتلاوة
(عطا الله بن ممدوح)

بعض البشر للناس مُورِف كما الفي
مدات جوده مثل نهرٍ فراتي
لو قلِّ ماله بسمته كنها الضَّي
ما شان وجهه لو بجوعه يباتي
(ناصر جمعان آل عوض)

يا كليب.. شب النار.. يا كليب.. شبه
عليك شبّه.. والحطب.. لك يجابي
وادغث لها ياكليب من سَمر جبّة
وشبّه.. إلى منّه غفى كل هابي
(دغيّم الظلماوي)