ياصدر احنك عن الضيق وتضيق
الى متى ذا الحزن ياصدر قلي
ياصدري الدنيا حظوظ وتوافيق
وانا من الثنتين ذي ما حصلي
لو ان حظي مثل حظ المرازيق
ما كان عود بي على طير ياللي
ماني بشاكي ضيقتي للمخاليق
اخاف احد يدري بكثري وقلي
دام الرجال اسرارهم بالصناديق
ماني بشاكي لو اموت بمحلي
(سالم بن جخير)

بعض المحبه نقص ماتسعى بزود
ياليت قلبي من سواياك اتّعض
مانفترق الا على شك وجحود
ومانجتمع الا لجل نجرح بعض
(سعد علوش)

تقول كيف الحال؟ مدري مواساه
وإلا كذا من باب .. روتين وحقوق
على العموم ... بخير والحمد لله
ماغير جيتك ضايق ورحت مخنوق
( سامي العرفج)

أنا متفائل بهـذا الصبح
تفائل الطفل بيد أمّه
اللي ما تنمد .. إلا بربح
وإذا انثنت راحت تضمّه
(ياسر التويجري)

غيبي بكيفك يا بعد كل ناسي
موافق تزيدين .. ضيقي وغُلبي
يوم انّك تحطّين راسك براسي!
ما ودّك .. تحطّيين قلبك بقلبي ؟
(عبدالله السرهيد)

ترى كل هالدنيا تساهيل.. مادام اننا بنعيش مره
تلدين وتزين التعاليل.. تصدين وتصد المسره
وأناديك ودموعي هماليل وفي الصدر تنهيده و حره
أحبك وما للحب تأويل ولا شفت منك إلا المضره
وتمونين يا ريم المكاحيل على القلب في خيره وشره
اذا جيتي استاهلك بالحيل واذا كان ما تبغين حره
فديت الوسيعات المظاليل.. رماح الهلاك المستشره
وخطواتك اللي بالخلاخيل، لها في الصدر والقلب جره
وسواليفك بكل التفاصيل وصوتك بها لله دره
ابي منك ما ينهد لي حيل على شي ما يسوى المبره
(ياسر التويجري)

يا درب قلبي شاب والعمر ما شاب
مسموع صوت الفقد والله مسموع
كني شتات حروف في صفحة كتاب
كني حبر ثوّار موقوف ممنوع
(جروح)

‏هذي مواري الصيف ، ولّا تباطيت
‏قربك.. و حسيت بدفاك يتنصّت
‏من وحشتي في كلمة أبغاك غصيت
‏حتى عيوني.. بحاير الدمع غصّت
(أحمد الطرقي)

‏ياطيحتي.. حتى اصدقاي خذلوني
‏تفرًقوا .. ماكني بعينهم شي
‏تخايلوا في مقتلي واتركوني
‏هالك ظما.. لاني بميت ولا حي
(محمد الدحيمي)

‏في سوريا‬ .. والموت ختّم جوازه
‏على الضمير الحي في كوكب الارض
‏من كثر ماصلّوا صلاة الجنازه
‏اطفالهم صاروا يحسبونها فرض
(فايز الرسلاني)