حتى إنت يالببسي علينا تغليت
هذا وحنا ما بيوم قطعناك
هذا وغازك فتت الكبد تفتيت
ولا ردنا غازك ولو كان فتاك
ليتك عن نصيص الزياده تعليت
ولا قلت بعين الزباين حلاياك
حرمت عنك عقبها دخلت البيت
ماني زبونك دام هذي سواياك
(غير معروف)
ياكاتب الذكرى على باب حمام
وش تنفعك ذكراك مع ريح ....!؟
ذكراك مازالت على مر الايام
كلن قراها واكثر الناس دقك
إن كنت ناقص عقل ماظن تنلام
وإن كنت جاهل واجبك من يطقك
وإن كنت مدرك ما كتبته بالأقلام
مكانك الحمام قدرك وحقك !
(عبدالله العتيبي)
تطوّرت العنز مع من تطوّر
ولا هوب مقصور التطور على الناس
عقب الربيع الزين والخد الأخضر
قامت تعلّك بالمدينه بقرطاس
ترضع صخلها من حليبٍ مبستر
تخشى رشاقتها مع الوقت تنداس
باقي قليل ويشرب التيس "منكر"
ويروّج الهروين راعي وعساس
(عابرة سبيل)
من اللي يسلفني شعور السعاده
وأهديه عشر سنين من عمري الجاي
لولا التشبث بالأمل والإرآده
لقيتني مجنون رسمي وبكاي
أحس أن بكره مجرد إعاده
لليوم واللي قبله وهذي دنياي
الألوآن واجد بس كل شي ساده
العيب في الألوان وإلا فرؤياي
أنا حزين إن الحزن صار عاده
ياليتني مخطي وأعرف وش خطاياي
أهديت للدنيا قصيد وسعاده
لكنها ما رجعت لي هداياي
(سعد علوش)
